Lam Alex
Workshop

從化妝到時裝造型的世界

 

近呢兩年好多明星藝人都結婚,係一件好開心嘅事,我見佢地影嘅婚紗相都相當有特色...近排因為朋友介紹,認識了一位岩岩幫結婚冇耐嘅「長腳蟹」(藝人:呂慧儀)造Pre Wedding Shooting嘅Stylist – Lam Alex。有幸嘅係,友人話可以帶咗我去見識一下。

當上到去火炭呢一個工業大廈後,見到簡潔嘅大木門上面掛住一個用皮手製的門鈴,好有Vintage嘅味道。。。入到去之後更加有一種好親切的感覺,就好似返咗屋企一樣,好舒服,而Alex亦都好Nice咁招呼我地。我見到擺放住幾個Dummy穿上Alex精心設計嘅服裝,令我急不及待想知多啲時裝造型係一個點嘅世界呢!~>w<”


記者 Lam Alex

1. Alex,你初初係點樣入行架?男仔從事化妝方面工作係咪好難?

當初我係做化妝師出生,但因為本身好鍾意電影嘅世界,同埋好喜歡張叔平先生,所以一直好想可以做到美術指導、服裝指導等。。。喺正式做左化妝師後,就開始嘗試免費幫人做服裝指導,慢慢就入左呢一行了。

其實男仔做化妝師呢一行都唔係好難。我係一個比較敢去試嘅人,我試過去幫自己修一堂女仔嘅眉,會試下幫自己上粉底,試下幫自己上遮暇膏睇下邊種較好用。現代嘅接受程度都愈來愈高,隔膜愈來愈少,所以男仔做化妝師都唔係太艱難,最緊要嘅係勇於嘗試。

 

2. 之後,點解慢慢會轉型做埋時裝造型設計呢?

初初都係因為抱著「好恨」跟住張叔平先生做野嘅心態,所以就決定試圖入行。亦都曾經考慮入電影呢一行,但因為顧慮電影呢行較難搵食,最後就揀左做廣告方面嘅工作。而我都好好彩接到好多瘦身同美容嘅廣告Job,所以慢慢令我係泳衣以及晚裝方面比較強,漸漸我都朝著設計服裝呢個方向一路做到依家了。。。


晚裝係Lam Alex強項之一

3. 除左時裝造型方面,你地仲會提供咩服務架?

哈哈...除了時裝造型外,我地仲會提供化妝、攝影同埋廣告造型等。。。因為我本身係一個鍾意玩嘅人,個腦比較多古靈精怪嘅idea,我都會接一啲 Event Job。就好似之前一個以「紅磨坊」為主題嘅保險Event,我會放好多較好玩同人性化嘅元素係活動當中,搵左一批外國dancer去跳Can Can(肯肯舞)或Tango(探戈舞)嚟加插係活動中,另外為咗配合主題亦都搵咗一班紅磨坊打扮嘅外國女人同客人影相留念。

而活動嘅裝飾擺設,都係由我去親自設計。私下同大家分享一下,其實我係一個有少少「購物狂」嘅人,儲存咗唔少關於裝飾擺設嘅支架 / 櫈等等...每次我見到一啲物料,即使嗰次活動唔岩用,但係好靚,我都會第一時間買左先。因為有啲靚嘅物料係可遇不可求,錯過左機會下次可能買唔返。同埋我亦都抱著一個心態 - 雖然依家唔岩用,但總有機會係岩用嘅。


靚嘅物料係可遇不可求,錯過左機會下次可能買唔返。。。然依家唔岩用,但總有機會係岩用嘅。

4. 係過程當中有冇遇到咩好難嘅事呀?有咩原因令你一直堅持走落去?

當然都有面對好多辛酸嘅野啦~~~好多時候啲客將成個晚裝設計交哂比我地時,我會幫佢地諗啲較為摩登嘅 idea。但最後個客會因為自己嘅堅持或者唔夠信心,聽咗太多人地嘅意見,而搞到最後成個設計出嚟效果唔係想像中咁理想。

滿足感,因為我好享受呢個滿足感。喺我地藝術行業冇正式嘅假期,人人都放假出街玩嗰時,我地仍然係需要好努力咁去練習我地嘅野。大家睇時裝雜誌會當係relax,但我地就好似係不斷喺到溫功課咁。加上我地嘅收入十分唔穩定,所以滿足感係令我地一直堅持落去好重要嘅因素。

雖然有辛酸嘅事,等我都同大家分享啲趣事啦~~因為我地比較有冒險家精神,鍾意去發拙啲新嘅地方去幫客人拍攝婚紗相,留低最靚嘅一刻。我地會去米蘭、布吉、捷克嘅白色小教堂、威尼斯嘅街邊同埋巴黎一D特別嘅地方等。。。曾經試過一次因為布吉教堂係唔可以影相嘅,但我地偷偷地走去影左,結果收到人地嘅warning letter了...><”

 

5. 有冇試過遇上冇靈感時候,點樣去解決問題?

冇靈感都真係好大鑊,但其實成日都會發生。所以當遇到呢個問題時,我會盡量安排時間去旅行relax,因為每次去旅行時就會令我有好多唔同嘅idea彈出嚟。去到唔同地方見到唔同嘅野時,會突然有勁多古靈精怪嘅idea出現係個腦到。

另外,我其中一個興趣係滑水同出海,我好鍾意痴住個海,又熱愛水上活動,仲特別鍾意玩水上電單車。每次出海都可以放鬆心情,令我可以重新努力投入工作當中。

去到唔同地方見到唔同嘅野時,會突然有勁多古靈精怪嘅idea出現係個腦到。

 

6. 你自己最滿意/難忘嘅作品?

講到最難忘嘅必定係岩岩入行時,當時會同攝影師合作一齊去影啲 Test(試拍),因為掣肘比較小,所以創作會比較夠膽。反而依家大咗,作品會收斂啲,所以當時做得最開心同舒服,壓力亦比較小。 講到最滿意嘅作品,會係立體嘅褂,因為花左好多心機同時間落去。另外,我地嘅裙有九成都會有build in咗corset(束衣)喺入面。我最滿意嘅地方,就係造左啲好岩東方人身形嘅corset(束衣),因為依家係街買到嘅晚裝裙,好多時都會只係岩外國人身形,佢地嘅身形同東方女性唔同。例如佢地嘅腰會長一吋半至兩吋,胸尖嘅位置,同埋座圍嘅形狀都唔一樣,所以喺剪裁上會有好大嘅分別。但經過幾年嘅努力,我地已經成功研究出一啲剪裁,好似呢條裙中間嘅摺位,如果係外國人嘅話,應該會分開啲;如果係東方人,摺位就要埋一啲。喺呢啲剪裁上,我地花咗好多心機,呢個係最滿足嘅。

 

7. 呢個行業嘅競爭都比較大,你覺得你地有咩優勝之處 / 特別之處呢?

我地特別之處係肯花時間去配合每一個客人嘅身形,亦肯花費喺衣服嘅物料上,即使係內裡嘅細節上,都會好比心機,例如裡布會用真絲,接駁位都會包住,務求令個客穿著得更加舒服,唔會有痕癢感。另一樣我地唔同嘅地方係我地唔會太商業化,有啲婚紗店會要求客人係咁加錢去upgrade服務,但我地會用單一價錢去提供全套服務,令客人更有預算。

加上我地有自己獨立辦房,而且香港嚟講設備咁齊全嘅辦房都比較少。我地有唔同嘅department,一件衫由紙樣師傅造紙樣,到釘珠師傅一針一線加工都能夠喺呢個辦房裡完成。而我地都一直堅持著「不斷練習」嘅理念,我會同成個團隊去練習以求做到最好。因為只有清楚知道每一個步驟,先可以做得更加好。


一件衫由紙樣師傅造紙樣,到釘珠師傅一針一線加工都能夠喺呢個辦房裡完成。

8. 你覺得做呢個行業,在當中得到最大的樂趣係咩呢?

我覺得對住唔同客嚟試唔同嘅衫係幾刺激嘅,因為改動係可以大到需要重新再砌過咁。當中樂趣,在於每個客都有獨特之處,就算身形差唔多,但所做出嚟嘅婚紗都可以完全好唔同,真係帶比我有好大嘅挑戰性。

另外,我好鍾意將平凡嘅女仔變到唔平凡,呢個亦係我鍾意婚禮化妝嘅原因。當我見到一個入嚟時平平凡凡嘅女仔,喺幫佢造型化妝後打扮到好靚,呢樣野係我好鍾意嘅。甚至乎我會係享受緊佢地嘅開心,呢個係錢比唔到嘅!嗰刻比我嘅滿足感會大咗好多,呢個開心會維持兩至三天。我好樂意喺形象上提供專業意見,好多人認為敬酒一定要著紅色同埋夠閃嘅,但我會將裙分成動態同靜態去配合唔同時段,好似動態裙係比較多活動時好似上落樓梯或敬酒時著嘅,靜態裙係入席前影相時著嘅。而我地開始hand made更多唔同嘅飾物去配合婚紗,因為市面上好難搵到好夾嘅飾物,所以我會用婚妙剩低嘅布料去造啲更配合嘅頭飾等等。。。由化妝、婚紗、以致飾物等,每個細節上花心思,等新娘們喺賓客面前show出最完美嘅一面,為佢地實現完美婚禮嘅夢想,比到我好大嘅滿足感。

 

9. 你覺得呢個行業嘅前景點呢?

我開始見到呢行嘅一個大方向係喺布料質量嘅選材上更加嚴謹,喺剪裁上嘅追求亦更加高,而唔係只為住「錢、錢、錢。。。」去做。呢行亦開始洶汰「不斷遊說個客去upgrade服務」呢種形式,更加著重明碼實價去做好一件事。結婚係一件令人開心嘅事,眼見同行喺服務同婚紗嘅質量上都開始改進,亦係我最想見到嘅。

 

10. 下一個你地嘅目標會係點呢,有冇話想達到啲咩?

依家呢個階段,我都發展得好順暢,已經好感恩啦。我嘅婚紗店都只係短短開左業約一年半,已經比我預期中多咗好多人識,同埋多咗人肯著我為佢地設計嘅裙。所以我會繼續努力做好自己,享受依家嘅工作。

現階段我地都只係專注做女裝方面,因為男裝比女裝嘅要求更加嚴謹。而且造男裝嘅師傅都開始退休,所以更難發展。但嚟緊我都會同另一間男裝舖合作去推出自家品牌,係比較摩登嘅男裝禮服。同時,因為香港較難買到好嘅婚紗物料,所以我會更專注喺造晚裝方面。我依家都同一間意大利嘅辦房合作,用佢地嘅剪裁方法同物料,但用我地嘅設計同數據去造我嘅個人品牌,所以我地嘅婚紗都係意大利進口架。@@


如果唔自強去練成百般武藝,只會被人淘汰,亦唔可以完成到自己心目中嘅理想作品。

11. 時下好多後生仔女都對呢一行充滿憧憬,你有冇咩鼓勵嘅說話同佢地講呢?

有呀,我一直好想鼓勵下後生仔女!希望新入行嘅後生仔女可以多啲著重喺基本工,要識多方面嘅技術。唔好只係想做前線,因為冇可能每個人都係明星,而明星背後嘅支援亦係好重要。時裝設計亦一樣,我地要有好嘅紙樣師傅、車衣師傅,釘珠師傅喺背後做支援,但依家呢啲工種已經好小人肯入行,而且現職嘅師傅都慢慢開始退休,遲啲嘅路會愈來愈難,都係令人擔心嘅事。所以新入行嘅後生仔女要靠自己,如果唔自強去練成百般武藝,只會被人淘汰,亦唔可以完成到自己心目中嘅理想作品。

 

後記:

因為我仲係單身嘅緣故,對於婚紗、晚裝造型唔太熟悉。。。喺Alex詳盡嘅解釋後,完全更新咗我對呢方面嘅認知...亦都喺過程當中比我見到Alex對呢個行業嘅熱情、認真,甚至乎佢會四處尋覓唔同嘅物料(例如:罕有嘅天然雀鳥羽毛),搜集靚嘅野,希望有日會用上呢啲珍貴嘅材料令服裝錦上添花。我真係好敬佩Lam Alex嗰個對靚嘅追求,而絕唔係為錢而做。見過Alex好多唔同作品後,令小妹我想起彭羚嘅一首歌《小玩意》...「你用無限濃情蜜意 來造迷人玩意……一世穿一次 小玩意 是女人的大志」,心底想結婚嘅衝動湧咗上泥,我都想結婚時搵Alex為我訂造一套獨一無二嘅婚紗呢,嘻嘻~~~@,@